Papaq var, qoyulan başdan bahadı

BU BAŞ BU PAPAĞA YARAŞMIR…

Bu baş bu papağa yaraşmır dədə,

Bu başın geyimi şal olmalıdı,

Bu başı salamat saxlasın deyə,

Bu başın sahibi lal olmalıdı.

***

Bu baş bu papağın nəyinə gərək?

Bu başa gündə yüz qapaz dəyəcək.

Bu papaq bu başla öyünə gərək, –

Yolunda gündəlik qapaz yeyəcək.

 ***

Bəxtəvər başına vallah bu başın,–

Nə həftə gözləyir, nə də ayını,

Yalvarmır, axıtmır gözünün yaşın,–

Dikəldi, – verirlər qapaz payını.

 ***

Papaq var, qoyulan başdan bahadı,

Geyənin papağa yazığı gəlmir.

Papaq var, verilib bir ölkə adı,

Onu geyən başlar heç vaxt dikəlmir.

 ***

Bəsdir İsaməddin, gülmə başlara,

Axı papaq nədir, – başın qapağı.

Çox başlar meylini salıb xaşlara,

İçi də tamam boş, – neynir papağı?!…

MÜƏLLİF: İSAMƏDDİN ƏHMƏDOV