TORPAĞIMIN
Yaranışdan daş-qaş olub hər zərrəsi,
Tarixlərdə şöhrəti var torpağımın.
Şölə salıb ürəklərə xəzinəsi,
Qucaq-qucaq neməti var torpağımın.
***
Ulu Tanrı qarşısında ağdı üzü,
Zalımların sinəsinə oxdu sözü,
Çalxansa da sağa-sola dövran özü,
Yenilməyən qüvvəti var torpağımın.
***
Həqiqətin nuru yağır amalından,
Babalarım güc alıbdı kamalından,
Dərdə şəfa, doymaq olmur camalından,
Dost yolunda ülfəti var torpağımın.
***
Tükənməzdi, müqəddəsdi duz-çörəyi,
Düşüncəli, qədirbilən var ürəyi,
Varlığına inamlıdır gələcəyi,
Haqq yolunda zəhməti var torpağımın.
***
Ömrümüzə rövnəq verir illər-aylar,
Üşütməyir daha bizi boran, nə qar,
Sevinməyə, öyünməyə haqqımız var,
Azərbaycan dövləti var torpağımın.
***
Cavanşirlər boy atıbdı qucağında,
Koroğlular isinibdi ocağında,
Yaradanın özü durub dayağında,
Fəlsəfəli isməti var torpağımın.
***
Varlığına baş əymişəm zaman-zaman,
Can yanğısın duymaz əsla gendən baxan,
Alov saçan ömür versə mənə aman,
Lələ ilə söhbəti var torpağımın.
Lələ MƏHƏMMƏD,
Otmanoba kəndi
