Zaqatalanın da öz saytı olacaq: “Zagatala.com”

Bölgə saytlarının sırasında bundan sonra Zaqatala rayonunun da öz saytı olacaq.

Yenicə fəaliyyətə başlayan www.zagatala.com saytı qarşıya bir sıra məqsədlər qoyub. Rayonun tanıdılması və təbliği, burada görülən işlərin geniş ictimaiyyətə çatdırılması saytın əsas hədəfləri sırasındadır. Saytda Zaqatalada təhsil, səhiyyə, mədəniyyət-incəsənət, idman sahələrinə aid xəbər və məqalələr yayımlanacaq, bu sahələr üzrə xidməti olan insanlar oxuculara tanıtdırılacaq. www.zagatala.com saytında həmçinin rayonda yaşayan əhalinin adət-ənənəsi, buranın mətbəxi barədə zəngin informasiyalar yayımlanacaq. Yaxın gələcəkdə saytda Zaqatala rayonu ilə maraqlanan istənilən şəxs ona lazım olan hər bir informasiyanı əldə edə biləcək. Gələcəkdə bu bölgəyə səfər etmək istəyən turistlər də saytın xidmətlərindən yararlana biləcəklər. Belə ki, www.zagatala.com-da bu bölgədə fəaliyyət göstərən turizm obyektləri, gəzməli, tanımalı, görməli yerlər, turistlər üçün əlverişli olan bölgələr, əyləncə kompleksləri, otellər haqqında ətraflı məlumatlar da yerləşdiriləcək.

www.zagatala.com saytının digər saytlardan üstünlüyü ondadır ki, burada xəbərlər həm yazılı, həm də video şəklində yayımlanacaq. Oxucular çətinlik çəkmədən saytı izləyə biləcəklər. Saytda oxucuların fikir və təkliflərini nəzərə alaraq məktublar bölməsi də aktiv fəaliyyət göstərəcək. Bu gün Zaqatala Azərbaycanın ən sürətlə inkişaf edən rayonlarından biridir. Odur ki, bu inkişafı www.zagatala.com-dan izləyə bilərsiniz.