Bəri başdan deyək ki, istər qadınlar, istər də kişilər üçün dinimiz xüsusi geyim forması əmr etməyib. Sadəcə olaraq qadınlar və kişilər üçün ölçülər müəyyən edilib ki, o ölçülərə əməl etmək əmr olunub.
Geyimlər fəsillərə görə dəyişdiyi kimi, coğrafiyalara, mədəniyyətlərə və iqlimlərə görə də dəyişir. Təbii ki, isti coğrafiyada yaşayanlar daha nazik geyimlər geyməlidirlər. Ancaq geyim o qədər nazik olmamalıdır ki, insanın bədəni onun içərisində görünsün. Soyuq ölkələrdə yaşayanların isə qalın parçalardan, heyvan dərilərindən hazırlanmış paltarlar geymələri təbiidir.
Geyim məsələsində diqqət edilməli başqa bir məsələ isə paltarın dar və ya uzun-qısa olmasıdır. İstər qadın olsun, istər kişi, bədənin cizgilərini hiss etdirən dar geyimlər geymək doğru deyil. Bu məsələyə təkcə dini baxımdan yox, psixoloji baxımdan yanaşanda da bu qənaətə gəlmək mümkündür. Dar geyimin başqa bir cəhəti isə sağlamlığımızla bağlıdır.
Geyim həm də insanın zövqünü, estetik dünyagörüşünü ifadə edən bir vasitədir. Gözəl görünmək, başqalarına xoş təsir bağışlamaq Uca Peyğəmbərimizin (s.ə.s.) tövsiyəsidir.
Geyimdə təmizliyə diqqət yetirmək lazımdır. Diqqət yetirmək lazımdır ki, paltarımız hər cür çirkabdan, nəcasətdən uzaq olsun. Peyğəmbərimizin (s.ə.s.) çox uzun geyinməyi qadağan etməsinin bir hikməti də görünür bununla bağlıdır. Şalvarın balağı yerlə sürünürsə, əlbəttə ki, ona çirkab da bulaşacaq, nəcasət də.
Geyim məsələsində bir də onu xatırlatmaq istəyirik ki, kişi cinsinə ipək paltar geymək dinimizə görə haramdır…