Dünya malı dünyanınkı olubdu,
Biz isə o varın niyyətindəyik.
Nəfsimiz bizləri oda salıbdı,
Düşmüşük, biz onun söhbətindəyik.
***
Əzəldən olmuşuq tamahın qulu,
Toplayır sərvəti, yığırıq pulu,
Tükənmir nəfsimiz, bağlanmır yolu,
Gedirik, şeytanın xidmətindəyik.
***
Halal nədir, haram nədir, bilmirik,
Toplayırıq, gətiririk, tikirik,
Nəfsimizlə bizlər nələr etmirik,
Bilmirik Allahın lənətindəyik.
***
Dostlar, aldanmayın dünya varına,
Çoxları düşübdü onun toruna,
Əlniyyət, zor gələr nəfsin zoruna,
Deyək ki, o zorun qüdrətindəyik?
Əlniyyət Əliyev
Zərdab Rayon Mədəniyyət Evinin bədii rəhbəri.
